Каляндар падзей:

27 кастрычніка 1926 г. Нясвіж наведаў маршал Юзаф Пілсудскі. Афіцыйнай мэтай прыезду было ўскладанне крыжа “VirtutiMilitari” на саркафаг былога ад’ютанта Начальніка Польскай дзяржавы Станіслава Радзівіла, які загінуў у 1920 г. і быў пахаваны ў фамільнай крыпце ў Нясвіжы. Пасля афіцыйнай цырымоніі Ю. Пілсудскі накіраваўся ў палац, дзе яго сустракаў Антоній Альбрыхт Радзівіл. На ўрачыстым прыёме маршал узняў тост у гонар дома Радзівілаў, каб “заставаўся такі сама вечны, як гэтыя старыя муры Нясвіжа”. Разам з Пілсудскім прыехалі першыя асобы Польскай дзяржавы і прадстаўнікі “крэсовай” арыстакратыі, такія як Яўстах Сапега, Станіслаў Ваньковіч, Януш Радзівіл і інш. Гэта дало падставу некаторым журналістам гаварыць пра з’езд у Нясвіжы, дзе нібыта абмяркоўвалася магчымасць аднаўлення манархіі і вылучэння Радзівіла на польскі трон (аб гэтым пісалі англійскія газеты). Камуністычная прэса пісала, што ў Нясвіжы выношваліся “планы ваенных паходаў на Мінск, Кіеў ды Коўна, каб паняволіць рабочых і сялян”. У сапраўднасці ж Ю. Пілсудскаму, які незадоўга перад гэтым здзейсніў дзяржаўны пераварот, была патрэбна падтрымка кансерватыўных землеўласнікаў, якія гуртаваліся вакол Альбрыхта Радзівіла. Мяркуючы па ўсім візіт дасягнуў сваёй мэты.