• Галоўная
  • /
  • Навiны
  • /
  • Выйшаў у свет “Каталог Радзівілаўскіх медалёў са збораў Нацыянальнага гісторыка-культурнага музея-запаведнка “Нясвіж”»

Выйшаў у свет “Каталог Радзівілаўскіх медалёў са збораў Нацыянальнага гісторыка-культурнага музея-запаведнка “Нясвіж”»

11.12.2014

У лістападзе 2014 г. убачыў свет “Каталог Радзівілаўскіх медалёў са збораў Нацыянальнага гісторыка-культурнага музея-запаведніка “Нясвіж”, падрыхтаваны малодшым навуковым супрацоўнікам Ганнай Быль. Прэзентацыя выдання адбылася падчас правядзення ў палацы Радзівілаў Другіх Навуковых Чытанняў памяці прафесара В.Н. Рабцэвіча 28 лістапада 2014 г., на якія сабраліся спецыялісты па нумізматыцы і фалерыстыцы з Беларусі, Украіны, Расіі, Літвы і Латвіі.

Невялікае па аб’ёму выданне (63 старонкі) складаецца з некалькіх частак: кароткага нарыса гісторыі нясвіжскіх манетна-медальных калекцый, уласна каталога і даведачнага апарата (тэрміналагічны слоўнік, паказальнік асабовы). Прыведзены выявы і апісанні 22 медалёў, звязаных з гісторыяй рода Радзівілаў, якія экспануюцца ў музеі-запаведніку “Нясвіж”. Укладальнік каталога дзеліць гэтыя помнікі фалерыстыкі на тры групы: медалі-персаналіі, прысвечаныя выбітным прадстаўнікам рода; медалі, звязаныя з жыццёвымі падзеямі – шлюб, смерць, дзень народзінаў – прадстаўнікоў радзівілаўскага дома; медалі ў гонар памятных дат, якія датычыліся фаміліі Радзівілаў. Кожны медаль падрабязна апісаны з перакладам лацінскай легенды на беларускую мову.

Каталог распачынае серыю «Studia Nesvisiensia» (Нясвіжскія даследванні), у якой будуць выдавацца матэрыялы рознага характара (зборнікі артыкулаў, каталогі) прысвечаныя гісторыі Нясвіжа, радзівілаўскай сям’і, рабоце музея-запаведніка. Можна не сумнявацца, што і каталог медалёў, і наступныя кнігі серыі будуць запатрабаванымі і прыцягнуць увагу гісторыкаў, музеязнаўцаў і проста людзей неабыякавых да мінулага сваёй краіны.