У Нясвіжскім замку пройдзе мерапрыемства ў гонар архітэктара Джавані Бернардоні

13 лютага 2019

16 лютага абудзецца міжнародны семінар «Роля Джавані Марыі Бернардоні ў езуіцкай архітэктуры Сардзініі і Беларусі» ў Нясвіжскім палацавым ансамблі

Выбітны італьянскі архітэктар Джавані Марыя Бернардоні шмат спрычыніўся да фарміравання знешняга аблічча Нясвіжа. Касцёл Божага Цела і Нясвіжскі палац, у будаўніцтве якіх ён прымаў удзел, сёння ўнесены ў Спіс Сусветнай спадчыны ЮНЕСКА. Аднак, перад тым, як прыехаць у Беларусь, Бернардоні з 1578 па 1583 г. жыў і працаваў на Сардзініі, дзе ў гарадах Кальяры, Сасары, Іглезіасе захаваліся ўнікальныя архітэктурныя комплексы, збудаваныя пад яго кіраўніцтвам.

Сёння Сардзінія адносіцца да ліку італьянскіх рэгіёнаў, якія найбольш актыўна супрацоўнічаюць з нашай краінай у сферы культуры і адукацыі. Сведчаннем гэтага з’яўляецца і міжнародны семінар «Роля Джавані Марыі Бернардоні ў езуіцкай архітэктуры Сардзініі і Беларусі», які пройдзе ў Нясвіжскім палацавым ансамблі 16 лютага. У якасці гасцей семінара будуць прысутнічаць Ганаровы консул Рэспублікі Беларусь на Сардзініі Джузэпэ Карбоні, дырэктар Цэнтра міжнародных сувязяў Міністэрства адукацыі Рэспублікі Беларусь Аляксандр Самуйліч, прадстаўнікі Нясвіжскага райвыканкама.

У праграме мерапрыемства выступленне творчага калектыва «Тэнорэс Su Cunsonu Santu Juanne de Thiesi». Тэнорэс — стыль сардзінскіх харавых спеваў, які зарадзіўся яшчэ ў дахрысціянскую эпоху. Рэлігійныя песні ў выкананні тэнорэс былі папулярнымі і ў XVI ст., таму не выключана, што Бернардоні мог неаднаразова іх чуць падчас свайго знаходжання на Сардзініі. У 2005 г. спевы сардзінскіх тэнараў былі ўнесены ў Спіс нематэрыяльнай спадчыны ЮНЕСКА як узор унікальнасці і прыгажосці. З улікам гэтага выступленне харавога калектыву ў залах Нясвіжскага палаца — помніка сусветнай спадчыны, набывае асаблівы сімвалізм.

З навуковымі дакладамі выступяць мастацтвазнаўца і арт-крытык Джорджа Пеллегрыні («Джавані Марыя Бернардоні і яго роля ў езуіцкай архітэктуры на Сардзініі, 1578–1583 гг.») і старшы навуковы супрацоўнік музея-запаведніка «Нясвіж» Аляксандр Яраш («Нясвіжскі езуіцкі калегіум: гісторыя, вывучэнне і перспектывы даследаванняў»).

Падчас семінара будзе працаваць фотавыстава «Джавані Марыя Бернардоні на Сардзініі», дзе можна ўбачыць вынікі працы Бернардоні на гэтым італьянскім востраве і параўнаць іх з беларускімі работамі. Напрыклад, купал рэлігійнага комплекса Сан-Мікеле ў Кальяры не выпадкова так падобны на «галаву» храма Божага Цела ў Нясвіжы.

Уваход на мерапрыемства вольны.

Падзяліцца ў сацыяльных сетках: