МІЖНАРОДНАЯ НАВУКОВАЯ КАНФЕРЭНЦЫЯ «ЛЁС ФАМІЛЬНЫХ СКАРБАЎ МАГНАЦКІХ РОДАЎ БЕЛАРУСІ» — музей-запаведнік «Нясвіж»

МІЖНАРОДНАЯ НАВУКОВАЯ КАНФЕРЭНЦЫЯ «ЛЁС ФАМІЛЬНЫХ СКАРБАЎ МАГНАЦКІХ РОДАЎ БЕЛАРУСІ»


10 лістапада 2020 г. у Нацыянальным гісторыка-культурным музеі-запаведніку «Нясвіж» адбудзецца Міжнародная навуковая канферэнцыя
«Лёс фамільных скарбаў магнацкіх родаў Беларусі»


 

«Лёс фамільных скарбаў магнацкіх родаў Беларусі» Культурна-гістарычная спадчына Беларусі — гэта шматгранны феномен, які ствараўся напрацягу стагоддзяў. Адметным густам і выкшталцонасцю адрозніваліся зборы арыстакратыі. Культурная прастора, якая існавала ў рэзідэнцыях магнатаў на тэрыторыі Беларусі спрыяла з’яўленню твораў высокага мастацкага ўзроўня. У беларускіх палацах і замках можна было сустрэць карціны Рэмбрандта, Рубенса, даспехі Кунца Лохнера, мэйсенскі парцэлянавы посуд і антычныя манеты і шмат іншага, што выконвала рэпрэзентатыўныя функцыі, здзіўляла і ўражвала гасцей магната.

Ад большай часткі палацаў і замкаў, якія існавалі на тэрыторыі Беларусі застаўся толькі напамін пра мінулае ў выглядзе пагоркаў з бачнымі дзе-нідзе кавалкамі цэглы і каменямі. Віхурлівыя падзеі і ваенныя канфлікты знішчылі гэтыя калекцыі як унікальныя зборы і раскідалі асобныя артэфакты з іх па свеце.

Падчас працы канферэнцыі будуць ахарактарызаваны розныя этапы развіцця калекцыянавання і сучасны падыход да стварэння і адраджэння калекцый у былых палацах і замках арыстакратыі, у тым ліку з дапамогай выкарыстання лічбавых тэхналогій. Дыгіталізацыя прадметаў мастацтва з некалі каласальных мастацкіх калекцый мэблі, гадзіннікаў, посуду, зброі і інш. паскарае працэсы навуковай атрыбуцыі гэтых культурных каштоўнасцяў, што неабходна для рэваларызацыі былых магнацкіх рэзідэнцый і напаўнення іх духам гісторыі.

Запрашаем да ўдзелу ў рабоце канферэнцыі гісторыкаў, мастацтвазнаўцаў, арт-дылераў і супрацоўнікаў аўкцыённых дамоў, музейных і бібліятэчных работнікаў.


Асноўныя накірункі работы канферэнцыі:

  •  магнацкія скарбніцы — генэзіс і эвалюцыя;
  •  збраёўня: традыцыя калекцыянавання мілітарыі;
  •  кнігазборы і зборы рукапісаў у магнацкіх бібліятэках і архівах;
  •  рэлігійныя ахвяраванні магнатаў у касцёлах, цэрквах і зборах Беларусі;
  •  жывапіс ў палацах і замках: ад сармацкіх партрэтных галерэй да спробаў музеефікацыі;
  •  кухонныя і гаспадарчыя рэчы (посуд, мэбля) ў палацах і замках арыстакратаў;
  •  мюнц-кабінеты ў рэзідэнцыях магнатаў;
  •  эвакуацыя магнацкіх калекцый падчас ваенных канфліктаў;
  •  беларускі антыкварыят на арт-рынках свету;
  •  дыгіталізацыя і ўвядзенне ў навуковы зварот гісторыка-культурнай спадчыны прадметаў з магнацкіх калекцый, вывезеных з тэрыторыі Беларусі
  •  выкарыстанне прадметаў з магнацкіх рэзідэнцый у інтэрактыўнай працы з музейнай аўдыторыяй.


Месца правядзення канферэнцыі: палацавы ансамбль XVI—XІХ стст. у Нясвіжы.

Рабочыя мовы: беларуская, руская, украінская, польская, англійская

Праграма канферэнцыі будзе складзена і даслана ўдзельнікам пасля заканчэння рэгістрацыі. Афіцыйнае персанальнае запрашэнне дасылаецца па запыце.


Для ўдзелу ў канферэнцыі неабходна да 1 кастрычніка 2020 г. даслаць заяўку і артыкул. Зборнікі матэрыялаў канферэнцыі будуць уручаны ўдзельнікам падчас пленарнага пасяджэння.


Заяўка на удзел (скачаць)

Патрабаванні да афармлення матэрыялаў: артыкулы, аб’ёмам да 40 000 знакаў, павінны быць набраны шрыфтам Times New Roman, кегль 14 пунктаў, праз 1,5 інтэрвала. З артыкулам павінны быць дасланы анатацыі на беларускай, рускай і англійскай мовах аб’ёмам 100–150 слоў кожная.

Бібліяграфічныя спасылкі афармляюцца згодна з правіламі ВАК! https://www.vak.gov.by/be/bibliographicDescription

Адрас аргкамітэта:

Нацыянальны гісторыка-культурны музей-запаведнік «Нясвіж»
вул. Ленінская, 19
222603, г. Нясвіж, Мінская вобласць, Беларусь.
E-mail: navukanhkmz@gmail.com

Каардынатары:

Караленак Уладзімір Уладзіміравіч,
вучоны сакратар 8 01770 2 42 81
Блінец Андрэй Уладзіміравіч,
старшы навуковы супрацоўнік 8 01770 2 42 81

Падзяліцца ў сацыяльных сетках: