"Херсанэс — горад двух тысячагоддзяў"

З 28 верасня  па 16 снежня 2026 г. у выставачнай зале аддзела экскурсійнай і інфармацыйнай дзейнасці Нацыянальнага гісторыка-культурнага музея-запаведніка "Нясвіж" дзейнічае часовaя экспазіцыя "Херсанэс — горад двух тысячагоддзяў".

Дзяржаўны гісторыка-археалагічны музей-запаведнік "Херсанэс Таўрычны" прадстаўляе выставу, прысвечаную гісторыі старажытнага горада і яго шматвяковым сувязям з тэрыторыяй сучаснай Беларусі.

Яна знаёміць з асноўнымі этапамі гісторыі Херсанэса — ад заснавання старажытнагрэчаскага горада ў V стагоддзі да н. э. і перыяду яго росквіту да рымскага і візантыйскага часу, а таксама з падзеямі, якія вызначылі асаблівае месца Херсанэса ў гісторыі Старажытнай Русі. Асаблівую ўвагу надаецца хрышчэнню князя Уладзіміра ў Корсуні і ролі Херсанэса як аднаго з найважнейшых злучных звёнаў паміж Візантыяй і Старажытнай Руссю.

Асобны раздзел экспазіцыі расказвае пра сувязі Херсанэса з Беларуссю. Яны праяўляюцца ў самых розных галінах — ад гандлёвых і культурных кантактаў да лёсу людзей, звязаных з гісторыяй старажытнага горада.

Наведвальнікі даведаюцца пра візантыйскія прадметы, якія былі выяўлены на тэрыторыі сучаснай Беларусі, і пра херсанэска-візантыйскія манеты X стагоддзя, якія сведчаць пра шырокія гандлёвыя і культурныя сувязі. Асаблівае месца займае Радзівілаўскі летапіс, мініяцюры якога распавядаюць пра падзеі канца X стагоддзя — аблогу Корсуні князем Уладзімірам, яго хрышчэнне і шлюб з візантыйскай прынцэсай Ганнай.

Яшчэ адна важная гісторыя звязана з Карлам Казіміравічам Касцюшка-Валюжынічам — заснавальнікам першага музея Херсанэса. Ураджэнец Магілёва, ён прысвяціў амаль два дзесяцігоддзі вывучэнню старажытнага горада, арганізаваў сістэматычныя раскопкі і ў 1892 годзе стварыў "Склад мясцовых старажытнасцяў" — першы музей Херсанэса.

Сувязь Херсанэса і Беларусі працягвалася і ў XX стагоддзі. У 1975 годзе тут праводзіліся здымкі знакамітага фільма "Прыгоды Бураціна" кінастудыі "Беларусьфільм". А з 1989 года Херсанэс штогод становіцца пляцоўкай для правядзення Дня славянскай пісьменнасці і культуры, у якім актыўна прымае ўдзел Севастопальскае нацыянальна-культурнае таварыства "Беларусь".

Выстава паказвае Херсанэс не толькі як выдатны помнік антычнай і візантыйскай гісторыі, але і як прастору, у якой на працягу стагоддзяў перасякаліся розныя культуры, людзі і гістарычныя шляхі.

вул. Замкавая, 2а.

Уваход бясплатны.