Часовая экспазіцыя “Звяжам свет прыгажосцю”

З 29 лістапада 2025 г. па 26 студзеня 2026 г. традыцыйна ў калекцыйнай зале “Нумізматыка і фалерыстыка” Палацавага ансамбля  — часовая экспазіцыя “Звяжам свет прыгажосцю”.

Экспазіцыя знаёміць наведвальнікаў з работамі майстроў-членаў міжнароднай школы аматараў ірландскіх карункаў пад кіраўніцтвам аўтара міжнароднага праекта і заснавальніка школы Вольгі Старасцінай.

У гэтым годзе на выставе прадстаўлены карункавыя сумачкі, гальштукі, прадметы гардэроба, выкананыя ў старадаўняй тэхніцы “ірландскія карункі”; сучасная інтэрпрэтацыя прадметаў у дадзенай тэхніцы.

Ірландскія карункі – гэта ўнікальная тэхніка, якая дазваляе ствараць складаныя і прыгожыя ўзоры. Карункавая сумачка, выкананая ў старадаўняй тэхніцы, стала папулярным аксэсуарам параўнальна нядаўна. Гэта звязана з адраджэннем цікавасці да рукадзелля. Першапачаткова ірландскія карункі выкарыстоўваліся для ўпрыгожвання адзення, абрусаў і іншых прадметаў інтэр'еру. Паступова майстрыхі сталі эксперыментаваць са стварэннем больш складаных і практычных вырабаў. Дызайнеры ацанілі прыгажосць і вытанчанасць карункаў і яны сталі з'яўляцца ў модных калекцыях.

Карункавы кардыган у тэхніцы “ірландскія карункі” мае больш даўнюю гісторыю, чым сумачка і гальштук. Іх насілі як частку паўсядзённага і вячэрняга гардэроба. Кардыган у гэтай тэхніцы застаецца запатрабаваным і сёння. Гэта прадмет адзення, які дадае выяве элегантнасці, вытанчанасці і вінтажнага шарму. Ён можа быць як паўсядзённым, так і святочным.

Запрашаем усіх акунуцца ў казачную атмасферу старадаўняй тэхнікі “ірландскіх карункаў”.

Наведаць выставу можна па ўваходных білетах на пастаянную экспазіцыю Палацавага ансамбля.